南九州新手自駕遊《九州攻略II》

【九州攻略II】南九州新手自駕遊

網上租車 一直都想喺日本自駕遊,第一次挑戰就揀喺南九州。因為人生路不熟,於是提前一個月上咗租車格價網站TOCOO搵車。同一般比較平台一樣,簡單輸入日期、地點等資料就搵到唔同車型及租車公司。當中最值得讚嘅資訊,就係「乘載量」同「建議乘客數」!事關去日本拎咁大個喼,就算租五人車最終都只可能坐到兩個人,多人一齊去嘅要注意啦!   取車及還車 最後揀定用一間叫Budget嘅喺鹿兒島機場拎車,租車公司提供免費接送服務,不過上網有人話要等好耐,就決定自己行去拎車!行落就知點解咁近距離,租車公司都會提供接送,因為沿途係無行人路㗎!只可以拖住個喼喺車路狂奔,好彩真係好近,行五分鐘就到。 除咗可以喺機場攞車同還車,其實市內仲有好多pick-up points。好似我哋因為俾航空公司改早咗回程班機,上網俾咗訂後先決定早一日還車慳返一日租金,都可以email轉open jaw還車,幾有彈性。   租車費用及其他開支 講起還車,唔少租車公司都會要求大家入滿油先還車,我哋都唔例外,不過第一次入油亦係最後一次,因為我哋嗰架係混能車,揸咗五日都唔駛點入油,租車費連埋大約200港幣油錢,2,400蚊有找。 由於我哋一早計劃自駕遊,預咗晚晚都瞓唔同酒店,所以book酒店時都盡量揀有泊車位嘅酒店。就我哋觀察,愈遠離鹿兒島(愈鄉郊)嘅酒店就愈多位泊車,唔少仲有得免費泊過夜!愈近城市嘅酒店泊位愈少,其中一晚嘅酒店係無停車場,好彩附近有唔少私營停車場,1,100 yen泊過夜。 自駕後體驗 話明第一次喺日本自駕遊,為咗其他道路使用者嘅安全,我哋盡量將每程車控制喺45分鐘之內,所以都算揸得好舒服。自駕遊最正嘅,係行程有超大彈性!我哋第一日落機就即刻揸車去霧島過一晚夜,第二朝去完高千歲牧場見時間仲早,就加插埋去全日本百大賞櫻地點之一嘅「母智丘公園」睇櫻花(不過已經水尾),全部30分鐘車程去得到,就算一家大細去咁多個景點都唔會覺得好chur。   而今個trip最深刻就一定係去櫻島!櫻島係一座活躍嘅複式火山,喺今年6月先至爆發過。我哋因為唔想長時間揸車,先一晚刻意喺都城過夜,第二朝再經陸路揸車進入櫻島。都城雖然只係個小市鎮,但位處都城盆地,東西兩側都係山地,沿路揸車好似喺森林入面穿越咁,風景好靚!揸咗一個鐘頭多啲,逐漸駛近櫻島,地勢就愈嚟愈低,林景仲開始變成海景,望住咁嘅靚景揸車簡直係享受。 選擇自駕仲享受到「揸車入島、坐船出島」兩種體驗。好多人都會喺鹿兒島市內坐船入去,而我哋揸車就喺櫻島東面進入。櫻島原本係一個孤島,四面環海,直到1914年嘅火山爆發令大量岩漿填滿咗東側嘅海峽,先令到櫻島同大隅半島相連, 亦我哋因為自駕遊,唔駛趕頭趕命,去勻晒南岳、中岳同北岳,仲可以慢慢睇火山活動嘅介紹,真係活生生一本地理書咁!臨走之前仲喺碼頭附近嘅恐龍公園兜咗一圈,因為要揸車先上到去公園,所以無咩人,可以慢慢影相。   無揸車嘅朋友就可以喺鹿兒島市內坐船去櫻島,再喺櫻島搭巴士環島遊,全程大約一個鐘,中途會停低喺北岳、南岳等俾大家落車影相,可以從唔同角度觀賞火山。不過聽講車程都幾趕,落車行五分鐘就俾人趕返上車,有少少鴨仔團feel。 唱錢小貼士:九州相對東京、大阪等熱門旅遊城市而言,付款嘅option無咁多,個別較近鄉郊地區嘅小店更只收現金!而雖然Visa同Master都算普遍,但只有少數連鎖店先收銀聯卡,ATM亦無咁多,最好預先唱定足夠嘅日圓啦! 相關內容:六日五夜玩轉南北九州!、「熱爆」京都、偶遇阿蘇神社 即睇日圓匯率 Andrea簡介: 做過4年財經記者,最愛睇(炒)外匯,對匯率變化敏感;加上師奶性格,唱錢時格價會「格」到小數點後兩個零。  

熱爆京都

【遊日手記】「熱爆」京都

近月多個國家都受熱浪侵襲,日本、韓國都錄得攝氏40度高溫,西班牙更高達44度,相當可怕!剛從日、韓旅行回來的朋友,都說酷熱難耐,無法在戶外逗留太久,唯有以的士代步,多了一筆預算之外的洗費。其實早幾年的8月,我也選擇在京都渡過生日,之後我告誡自己,絕對不要再選這個時間到日本!

六日五夜玩轉南北九州

【遊日攻略】六日五夜玩轉南北九州!

之前去親日本都係滑雪,行程一式一樣,重點係有同伴一早安排好所有行程,衣食住行都唔駛自己煩。幫人安排行程依個角色真係唔易做,風水輪流轉,上次去鹿兒島嘅我就感受至深。 難得同朋友夾到假期,於是齊齊搶機票,四月份一行五人去鹿兒島玩返六日五夜。以為去日本好容易,於是嘆慢板,酒店都係出發前三個星期先訂。喺搵酒店期間,先發覺鹿兒島(南九州)本身係唔足以玩五日!問咗好多人意見後,決定一落機就坐火車去福岡(北九州),尾後兩日先返鹿兒島。

偶遇阿蘇神社

【遊日手記】偶遇阿蘇神社

早年非常喜歡到歐洲旅行,友人經常驚嘆我去歐洲的旅費如此低,其實如果大家以去日本的方式去歐洲旅行,當然很大機會破產收場,但若不追求頂級享受,在歐洲無論在食、住、行,都可以省下不少旅費。在日圓還是「十算」的年代,我去兩星期歐洲和一星期日本,其實最終花費相若,雖然兩種旅行方式完全不同,但玩兩星期和一星期之間如何抉擇,你懂的。