南九州新手自駕遊《九州攻略II》

【九州攻略II】南九州新手自駕遊

網上租車
一直都想喺日本自駕遊,第一次挑戰就揀喺南九州。因為人生路不熟,於是提前一個月上咗租車格價網站TOCOO搵車。同一般比較平台一樣,簡單輸入日期、地點等資料就搵到唔同車型及租車公司。當中最值得讚嘅資訊,就係「乘載量」同「建議乘客數」!事關去日本拎咁大個喼,就算租五人車最終都只可能坐到兩個人,多人一齊去嘅要注意啦!

南九州新手自駕遊《九州攻略II》 南九州新手自駕遊《九州攻略II》

取車及還車
最後揀定用一間叫Budget嘅喺鹿兒島機場拎車,租車公司提供免費接送服務,不過上網有人話要等好耐,就決定自己行去拎車!行落就知點解咁近距離,租車公司都會提供接送,因為沿途係無行人路㗎!只可以拖住個喼喺車路狂奔,好彩真係好近,行五分鐘就到。

除咗可以喺機場攞車同還車,其實市內仲有好多pick-up points。好似我哋因為俾航空公司改早咗回程班機,上網俾咗訂後先決定早一日還車慳返一日租金,都可以email轉open jaw還車,幾有彈性。

南九州新手自駕遊《九州攻略II》 南九州新手自駕遊《九州攻略II》

租車費用及其他開支
講起還車,唔少租車公司都會要求大家入滿油先還車,我哋都唔例外,不過第一次入油亦係最後一次,因為我哋嗰架係混能車,揸咗五日都唔駛點入油,租車費連埋大約200港幣油錢,2,400蚊有找。

由於我哋一早計劃自駕遊,預咗晚晚都瞓唔同酒店,所以book酒店時都盡量揀有泊車位嘅酒店。就我哋觀察,愈遠離鹿兒島(愈鄉郊)嘅酒店就愈多位泊車,唔少仲有得免費泊過夜!愈近城市嘅酒店泊位愈少,其中一晚嘅酒店係無停車場,好彩附近有唔少私營停車場,1,100 yen泊過夜。

自駕後體驗
話明第一次喺日本自駕遊,為咗其他道路使用者嘅安全,我哋盡量將每程車控制喺45分鐘之內,所以都算揸得好舒服。自駕遊最正嘅,係行程有超大彈性!我哋第一日落機就即刻揸車去霧島過一晚夜,第二朝去完高千歲牧場見時間仲早,就加插埋去全日本百大賞櫻地點之一嘅「母智丘公園」睇櫻花(不過已經水尾),全部30分鐘車程去得到,就算一家大細去咁多個景點都唔會覺得好chur。

南九州新手自駕遊《九州攻略II》 南九州新手自駕遊《九州攻略II》

而今個trip最深刻就一定係去櫻島!櫻島係一座活躍嘅複式火山,喺今年6月先至爆發過。我哋因為唔想長時間揸車,先一晚刻意喺都城過夜,第二朝再經陸路揸車進入櫻島。都城雖然只係個小市鎮,但位處都城盆地,東西兩側都係山地,沿路揸車好似喺森林入面穿越咁,風景好靚!揸咗一個鐘頭多啲,逐漸駛近櫻島,地勢就愈嚟愈低,林景仲開始變成海景,望住咁嘅靚景揸車簡直係享受。

選擇自駕仲享受到「揸車入島、坐船出島」兩種體驗。好多人都會喺鹿兒島市內坐船入去,而我哋揸車就喺櫻島東面進入。櫻島原本係一個孤島,四面環海,直到1914年嘅火山爆發令大量岩漿填滿咗東側嘅海峽,先令到櫻島同大隅半島相連,

亦我哋因為自駕遊,唔駛趕頭趕命,去勻晒南岳、中岳同北岳,仲可以慢慢睇火山活動嘅介紹,真係活生生一本地理書咁!臨走之前仲喺碼頭附近嘅恐龍公園兜咗一圈,因為要揸車先上到去公園,所以無咩人,可以慢慢影相。

南九州新手自駕遊《九州攻略II》 南九州新手自駕遊《九州攻略II》

無揸車嘅朋友就可以喺鹿兒島市內坐船去櫻島,再喺櫻島搭巴士環島遊,全程大約一個鐘,中途會停低喺北岳、南岳等俾大家落車影相,可以從唔同角度觀賞火山。不過聽講車程都幾趕,落車行五分鐘就俾人趕返上車,有少少鴨仔團feel。

唱錢小貼士:九州相對東京、大阪等熱門旅遊城市而言,付款嘅option無咁多,個別較近鄉郊地區嘅小店更只收現金!而雖然Visa同Master都算普遍,但只有少數連鎖店先收銀聯卡,ATM亦無咁多,最好預先唱定足夠嘅日圓啦!

相關內容:六日五夜玩轉南北九州!「熱爆」京都偶遇阿蘇神社

即睇日圓匯率

Andrea簡介:
做過4年財經記者,最愛睇(炒)外匯,對匯率變化敏感;加上師奶性格,唱錢時格價會「格」到小數點後兩個零。

 

Related Post

信報財經 – YBEX:下一步擴外幣兌換增值服務... 香港人愛外遊,但往往為找到最便宜的外幣滙率而頭痛,本地初創、外滙格價應用程式YBEX因此應運而生,供用家即時鎖定滙率。YBEX行政總裁李振寧表示,日後將研究拓展中小企業務,長遠的目標是申請成為虛擬銀行。 YBEX是一個外幣找換平台,提供不同找換店的滙價供用家參考,用家隨後可透過YBEX平台即時鎖定...
【胡志明市三寶】咖啡、越南粉、法國菜... 大家有沒有旅遊Bucket list?我有!名單上的地方不斷增加,幸運地也有不少願望已達成。其中一個是到柬埔寨看吳哥窟,數年前已經如願,當年香港還未有直達暹粒的航班,必須從泰國或越南轉機,泰國經常會去,結果行程尾站揀選逗留從未踏足的越南胡志明市。 有朋友曾被公司派到胡志明市工作一段時間,說當...
【窮遊歐洲必睇】歐洲火車、廉航懶人包... 火車篇 喺歐洲大部分嘅火車都係國營嘅,所以都無咩懸念。但當然都有例外,而私營嘅火車好多時候都會平啲,例如係奧地利嘅Westbahn,由Vienna去Salzburg就平過國營嘅OBB一大截。 小貼士1:留意有好多火車公司都會要求你上網買完飛、去到站嘅時候拎番張實體飛,買飛嘅時候記得留意啦!去到站入...
【2018韓幣兌換攻略II】明洞找換店vs銀聯匯率ATM大比併... 首爾作為南韓首府,唔單止具備歷史文化、亦係帶領亞洲潮流嘅重鎮;美食唔單止好多地道選擇,想蒲cafe、幫襯d hipster餐廳都大把得揀,緊係成為香港人熱門旅遊地點之一啦!上網隨便揀個日子一search,香港飛首爾嘅直航航班竟然多達每日23班!方便一班「視旅行為正職」嘅朋友weekend飛首爾。朋友...

Leave a Reply

This site uses Akismet to reduce spam. Learn how your comment data is processed.